Da Ludwig I., Kini vo Bayern (* 25. August 1786 z Strassburg; † 29. Feba 1868 z Nizza) wor a Fiascht ausm Gschlecht vo de Wittelsbacha. Ea is seim Voddan Max I. noch dem seim Doud 1825 afn Thron gfoigt und hod im Revolutionsjoar 1848 zugunstn vo seim Suhn Maxi II. obdankt.
Da Ludwig hod vui fias kuiturelle Lem im Kinereich Bayern do, bsundas z Minga. Des segst an da Ludwigstroß mit Siegestor und Fejdheanhoin, genau so wia am Kiniplatz und da Scheenheidngalerie im Schloss Nymphenburg. Aba ohne an Ludwig I. gabs aa koa Bavaria z Minga und a koa Wiesn. Eascht seit da Houzat vom Ludwig I. und da Therese vo Hildburghausen, am 17. Oktoba 1810, gibts as Oktoberfest (des easchte hod zua Houzatfeia gheat). Weil a so vui ibaghobt hod fia Griachaland, is nacha sei zwoata Bua, da Otto I., Kine vo Griachaland worn (desweng hom de Griacha a weißblaue Fahna). Er sejm hod 1848 abdanka miassn, weng oana Affär mit da Dänzarin Lola Montez. Er hod in Thron seim easchtn Suhn Max II. ibagem. A weitara Bua vo eahm wor da spadare Prinzregent Luitpold, da Stammvoda vo de heitign Wittelsbacha.